පරාක්‍රම කුරුප්පු විසිනි

2026 අගෝස්තු 10 වන දින දකුණුදිග යුක්‍රේනයේ පර්වෝමේස්ක්හි අධිකරණයක් 27 හැවිරිදි සමාජවාදියෙකු වන බොග්ඩාන් සයුරොටියුක්ට 15 වසරක සිර දඬුවමක් පැනවීය. ඔහු විසින් කරන ලද ‘අපරාධය’ වන්නේ, ඇමරිකානු හා යුරෝපීය අධිරාජ්‍යවාදීන් යුක්‍රේනය බළල් අතක් ලෙස යොදා ගනිමින් රුසියාවට එරෙහිව ගෙන යනු ලබන යුද්ධයට එරෙහිව ලිපි හයක් ලිවීමයි!

බොග්ඩාන් සයුරොටියුක්ට පැනවූ මෙම දඬුවම හෙළා දකින Socialist.lk වෙබ් අඩවිය, එම දඬුවම අහෝසි කරන ලෙසත්, ඔහු වහා මුදා හරින ලෙසත් ඉල්ලා හතරවැනි ජාත්‍යන්තරයේ ජාත්‍යන්තර කමිටුව හා ලෝක සමාජවාදී වෙබ් අඩවිය විසින් ගෙන යන අරගලයට සහාය දෙන ලෙසත්, ඒ සඳහා ස්වාධීනව නැඟී සිටින ලෙසත් කම්කරුවන්, ශිෂ්‍යයන් හා තරුණයන් ඇතුළු සිය පාඨකයන්ගෙන් ඉල්ලා සිටී.

බොග්ඩාන් සයුරොටියුක් පෙර සෝවියට් සංගමය ලෙස පැවැති කලාපයේ ක්‍රියාත්මක වන ට්‍රොට්ස්කිවාදී සංවිධානයක් වන බොල්ෂෙවික්-ලෙනින්වාදීන්ගේ තරුන රැකවල (YGBL)හි ප්‍රමුඛ සාමාජිකයෙකි. ‘යුද්ධ නීතිය යටතේ රාජද්‍රෝහී චෝදනා’ මත 2024 අප්‍රේල් 25 වන දින යුක්‍රේන ආරක්ෂක සේවය (SBU) ඔහු අත්අඩංගුවට ගත් අතර, එතැන් පටන් මෙම සිර දඬුවම පැනවූ අගෝස්තු 10 දින දක්වා මාස 27 ක කාලයක් ඔහු ගත කළේ, ධාරිතාව ඉක්මවා කටුක තතු යටතේ සිරකරුවන් ගාල් කර ඇති නිකොලයෙව් බන්ධනාගාරයේ ය.   

ඔහුට එරෙහි චෝදනාව ‘යුද්ධ නීතිය යටතේ රාජද්‍රෝහීවීම’ වන නමුදු, ඔහුට එරෙහිව ඔත්තු බැලීමේ, කඩාකප්පල් කිරීමේ, කිසිදු හමුදා බලයක් සමඟ කිසිදු සම්බන්ධතාවයක් පැවැත්වීමේ චෝදනා කිසිවක් නො නැඟේ. රාජද්‍රෝහීත්වය පිළිබඳ සියලු චෝදනා එල්ල වී තිබෙන්නේ ලෝක සමාජවාදී වෙබ් අඩවියේ පළකෙරුණු ඔහුගේ දේශපාලන ලිපි වලට හා එය පළ කළ කර්තෘවරුන් වෙත ඔහු එවූ පණිවුඩ සම්බන්ධයෙනි. ඔහුට වසර පහළොවක සිර දඬුවමක් ලබා දී ඇත්තේ ලිපි හයක් ලිවීම සම්බන්ධයෙනි.

මේ ලිපිවල අන්තර්ගතය කවරාකාර වී ද?

මේ ලිපි තුළ රුසියාවේ යුක්‍රේන ආක්‍රමණය හෙළා දැක ඇත. කියෙව් තන්ත්‍රය හිස සිට දෙපතුළට සන්නද්ධ කරමින් සිටින නැටෝ බලවතුන් හෙළා දැක ඇත. එම ලිපි මඟින් යුක්‍රේනයේ හා රුසියාවේ කම්කරු පන්තියට කැඳවුම් කර ඇත්තේ යුද්ධයට එරෙහිව තම තම රටවල පාලක පන්තීන්ට එරෙහිව ඒකාබද්ධ වන ලෙසයි. කෙතරම් ”ද්‍රෝහීත්වයක්” ද?

බොග්ඩාන් සිය ලිපි තුළ ”ජාතික වීරයන් පිළිබඳව යළි අර්ථ කථනය” කර ඇති බව හා ඔවුන් ”ෆැසිස්ට්වාදීන් හා නාසීන් සමඟ සංසන්දනය කර” ඇති බවත් අධිකරණ තීන්දුවේ විශේෂයෙන් උපුටා දක්වා ඇත. එම සඳහන විසින් අදහස් කරනු ලැබ ඇත්තේ, යුදෙව් ජාතිකයන්ට එරෙහි සමූලඝාතන ව්‍යාපාරයට සහකාරකයන් ලෙස සහභාගී වූ ස්ටෙපාන් බන්දේරා සහ OUN සංවිධානය පිළිබඳ ඔහුගේ හෙළිදරව් කිරීම් ය. අද යුක්‍රේනය තුළ නාසීන් හෙළා දැකීම අපරාධයක් වී ඇත.    

මෙම තීන්දුව ඒකාධිපතිවාදී ක්‍රියාවකි. සෙලන්ස්කිගේ ධුර කාලය 2024 මැයි මාසයේ අහෝසි වී ඇතත්, ඔහු සිය නෛතික වරම ඉක්මවා දෙවසරකට වැඩි කාලයක් තවමත් බලයේ රැඳී සිටින්නේ ස්ථාවර යුද්ධ නීතියේ විධිවිධාන ප්‍රකාරව ය. මැතිවරණ අවලංගු කර ඇත. වාමාංශික පක්ෂ මුළුමණින් තහනම් කර ඇත. ‘යුද්ධය පවත්වා ගෙන යන්නේ ”ප්‍රජාතන්ත්‍රවාදය” වෙනුවෙනැ’යි කියා පාමින් එක්සත් ජනපදය හා නැටෝව ඩොලර් කෝටි ගණන් වටිනා යුද අවි වර්ෂාවන්ගෙන් නහවන්නේ, බොග්ඩාන් සිරගත කළ මෙකී යුක්‍රේන ආණ්ඩුවයි. මෙම දණ්ඩනය එකී මුසාව නිශ්චිත ලෙස හෙළිදරව් කර ඇත.  

බොග්ඩාන්ගේ සෞඛ්‍ය තත්ත්වය පිරිහෙමින් පවතී. දැනට වසරකට වඩා වැඩි කාලයක් ඔහුට ලැබිය යුතු හදිසි වෛද්‍ය ප්‍රතිකාර කිසිවක් ලබා දී නැත. සිරකරුවන් උතුරා යන, වධදීම් හා අත්අඩංගුවේ සිටිය දී සිදුවන මරණ සංඛ්‍යාවන් පිළිබඳව එක්සත් ජාතීන්ගේ හා යුරෝපා කවුන්සිලයේ ලිඛිත වාර්තා නොමඳව පවතින යුක්‍රේන සිරගෙවල් පද්ධතිය තුළ පහළොස් වසරක සිර දඬුවමක් යනු මරණ දඬුවමකි. 

මේ මරණීය තර්ජනය එල්ල වී ඇත්තේ සිය අදහස් දැරීමට හා ඒවා ප්‍රකාශයට පත් කිරීමට තමාට ඇති මූලික මිනිස් අයිතිය ක්‍රියාත්මක කිරීමට බොග්ඩාන් ඉදිරිපත් වූ නිසා ය. මේ අපරාධකරණයට භාජනය කර ඇත්තේ එම අයිතියයි. ඊට ද වඩා, යුද්ධය පිළිබඳ ස්වාධීන මතයක් දැරීමට හා ඒ පිළිබඳ උද්ඝෝෂණය කිරීමට කම්කරු පන්තියට ඇති අයිතියයි. ලෝක යුද්ධයක එළිපත්තේ සිටින අධිරාජ්‍යවාදීන් හෙට දින රටක් රටක් පාසා මෙසේ සිය යුද්ධයට එරෙහි ස්වාධීන අදහසක් දැරීම අපරාධයකැයි නම් කරනු ඇත. ඒ සඳහා නීති සම්පාදනය කරනු ඇත. එම නීති මඟින් ලක්ෂ ගණනින් මිනිසුන් සිරගත කරනු ඇත. මේ නිසා, බොග්ඩාන් සයුරොටියුක්ට පැනවූ දණ්ඩනයට එරෙහිව නැගී සිටිමින් ඔහුගේ නිදහස සඳහා පෙනී සිටීම කම්කරු පන්තියට හා යුද විරෝධී සියලු ජනයාට තමන්ගේ ම කර්තව්‍යයකි.

මෙම තීන්දුවට එරෙහිව දින 30 ක් ඇතුළත අභියාචනයක් ගෙන ඒමට අවකාශ ඇත. බොග්ඩාන් සම්බන්ධයෙන් මානව හිමිකම් පිළිබඳ යුරෝපා අධිකරණයට ඉදිරිපත් කර ඇති පැමිණිල්ල එම අධිකරණය විසින් දැනටමත් පිළි ගෙන ඇත. ඔහුගේ නිදහස සඳහා වන අරගලය දැන් තීරණාත්මක හා අත්‍යවශ්‍ය වේ. ඔහුගේ නිදහස ඉල්ලා ලෝක සමාජවාදී වෙබ් අඩවිය දියත් කර ඇති පෙත්සම් ව්‍යාපාරයට විශාල සහායයක් ගොනු වෙමින් පවතී. නිව්යෝර්ක් ටයිම්ස්, BBC, CNN, රොයිටර් වැනි ප්‍රමුඛ ධනපති මාධ්‍ය මෙන්ම ඇම්නෙස්ටි ඉන්ටර්නැෂනල්, හියුමන් රයිට්ස් වොච් වැනි සංවිධාන ද මේ සම්බන්ධයෙන් අපරාධකාරී මුනිවතක් රකිමින් යුක්‍රේන ආණ්ඩුවේ අපරාධ සහායකයන් ලෙස ක්‍රියා කරද්දී, රටවල් හතළිහක ඉතිහාසඥයන්, වෛද්‍යවරුන්, ගුරුවරුන්, කම්කරුවන් හා කලාකරුවන් රැසක් ඇතුළු හය දහස් ගණනක් පෙත්සමට අත්සන් තබා ඇත.

බොග්ඩාන් සයුරොටියුක් දේශපාලන සිරකරුවෙකි. ඔහු සිරගත කිරීමට හේතුභූත වූ ඔහු පිළිගත් ඉදිරි දර්ශනය; එනම්, තම තම පාලක පන්තීන්ට එරෙහිව දේශසීමා ඉක්මවා යමින් කම්කරු පන්තිය ඒකාබද්ධවීම; යනු අධිරාජ්‍යවාදී යුද්ධය හමුවේ සමස්ත ජාත්‍යන්තර කම්කරු පන්තිය හමුවේ ඇති එකම ඉදිරි දර්ශනයයි. සෙලන්ස්කි තන්ත්‍රය ඔහුගේ නිදහස ප්‍රදානය කරන්නේ නැත. එය දිනා ගත යුත්තකි. ලොව පුරා කම්කරුවන්, තරුණයන් හා ප්‍රජාතන්ත්‍රවාදී අයිතීන් ආරක්ෂා කරන්නන් බලමුළු ගන්වා දිනා ගත යුත්තකි.

ඒ සඳහා ලෝක සමාජවාදී වෙබ් අඩවියේ ඇති Demand the freedom of Ukrainian socialist and anti-war activist Bogdan Syrotiuk! සම්බන්ධකය ඔස්සේ පිවිසී පෙත්සම අත්සන් කරන ලෙස ද, පර්වොමේස්ක් නගරයේ දිස්ත්‍රික් අධිකරණය (ඊ මේල් ලිපිනය: inbox@pm.mk.court.gov.ua) හා මයිකොලේව් අභියාචන අධිකරණය (ඊ මේල් ලිපිනය: inbox@mka.court.gov.ua) වෙත, බොග්ඩාන්ට එරෙහි තීන්දුව අහෝසි කරන ලෙසත්, ඔහු නිදහස් කරන ලෙසත් ඉල්ලා විද්‍යුත් පණිවුඩ යවන ලෙස ද, එකී විද්‍යුත් පණිවුඩවල පිටපත් freebogdan@wsws.org වෙත යොමු කරන ලෙස ද අපි අපේ පාඨකයන්ගෙන් ඉල්ලා සිටිමු.  

පසු සටහන:

බොග්ඩාන් සයුරොටියුක් සහෝදරයාට පනවන ලද 15 අවුරුදු සිර දඬුවමට විරෝධය පළකරමින්, එම දඬුවම කොන්දේසි විරහිතව අහෝසි කරන ලෙසත්, ඔහුට එරෙහි චෝදනා අහෝසි කරන ලෙසත් ඉල්ලා සිටිමින් පහත දැක්වෙන ඊමේල් පණිවුඩය මයිකොලේව් අභියාචනා අධිකරණය වෙත හා පර්වොමේස්ක් නගර දිස්ත්‍රික් අධිකරණය වෙත යවා ඇත. එහි සිංහල පරිවර්තනය ද පහත දැක්වේ:

To the Mykolaiv Court of Appeal,

I am the editor of Socialist.lk website, writing from Colombo, Sri Lanka.

I am writing to protest the sentencing of Bogdan Syrotiuk to 15 years’ imprisonment by the Pervomaisk City District Court on 10 August 2026, and to demand his immediate and unconditional release and the quashing of all charges against him.

According to the court’s own ruling, the sole evidence against Mr. Syrotiuk consists of six political articles in which he condemned both the Russian invasion of Ukraine and the role of NATO in prolonging the war, and called for the unity of Ukrainian and Russian workers against their own ruling classes. No act of espionage, sabotage, or collaboration with any military force was presented. The state’s own forensic commission was forced to drop one of the seven articles originally cited from the indictment after finding nothing criminal in it. Mr. Syrotiuk has been sentenced to 15 years for six political articles.

The prosecution of a socialist for his political writings is a violation of the most fundamental democratic rights — freedom of speech, freedom of the press, and freedom of political association. It exposes the claim that this war is being fought for “democracy” as a fraud. The banning of left-wing political parties, the cancellation of elections, the suppression of independent media, and now the jailing of an anti-war socialist for 15 years — these are the acts of a dictatorship, not a democracy.

This case is being followed internationally by thousands of people in over 40 countries. The European Court of Human Rights has already accepted Mr. Syrotiuk’s application. Historians, doctors, teachers and workers on five continents have written to protest his imprisonment. The world is watching.

I demand that the Mykolaiv Court of Appeal overturn the verdict of 10 August 2026 and order the immediate and unconditional release of Bogdan Syrotiuk.

Yours faithfully,

Parakrama Kuruppu

Editor – Socialist.lk Colombo, Sri Lanka

සිංහල පරිවර්තනය:

මයිකොලේව් අභියාචනා අධිකරණය වෙත,

Socialist.lk වෙබ් අඩවියේ කර්තෘ වන මම ශ්‍රී ලංකාවේ කොළඹ නගරයේ සිට මෙය එවන්නෙමි.

මා මෙම විද්‍යුත් ලිපිය එවන්නේ පර්වොමේස්ක් නගර දිස්ත්‍රික් අධිකරණය විසින් 2026 අගෝස්තු 10 වන දින බොග්ඩාන් සයුරොටියුක්ට පනවන ලද 15 අවුරුදු සිර දඬුවමට මගේ විරුද්ධත්වය ප්‍රකාශ කිරීමට සහ, ඔහු වහාම හා කොන්දේසි විරහිතව මුදා හරින ලෙසත්, ඔහුට එරෙහි සියලු චෝදනා වලින් ඔහු නිදහස් කරන ලෙසත් ඉල්ලා සිටීම සඳහා ය.

අධිකරණයේම තීන්දුවට අනුව, සයුරොටියුක් මහතාට එරෙහිව පවතින එකම සාක්ෂිය සමන්විත වන්නේ, රුසියාවේ යුක්‍රේන ආක්‍රමණය හා නැටෝව යුද්ධය දිගටම පවත්වා ගෙන යාම යන දෙකම හෙළා දකිමින්, සහ තම තම පාලක පන්තීන්ට එරෙහිව එක්සත් වෙන ලෙස යුක්‍රේන හා රුසියානු කම්කරුවන්ට කැඳවුම් කරමින්, ඔහු විසින් ලියන ලද දේශපාලන ලිපි හයකිනි. ඔත්තු බැලීමේ, කඩාකප්පල් කිරීමේ, හෝ කිසිදු හමුදා බලයක් සමඟ කිසිදු සම්බන්ධතාවයක් පැවැත්වීමේ ක්‍රියාවක් පිළිබඳ පැමිණිල්ලක් ඉදිරිපත් වී නැත. අධිකරණයේම තීන්දුවට අනුව, සිරොටියුක් මහතාට එරෙහි එකම සාක්ෂිය වන්නේ රුසියානු යුක්රේන ආක්‍රමණය සහ යුද්ධය දිග්ගැස්සීමේ නේටෝවේ භූමිකාව යන දෙකම හෙළා දුටු දේශපාලන ලිපි හයක් වන අතර, චෝදනා පත්‍රයෙන් මුලින් උපුටා දක්වන ලද ලිපි හතෙන් එකක්, එහි අපරාධයක් නොමැති බව සොයා ගැනීමෙන් පසු, රාජ්‍යයේම අධිකරණ වෛද්‍ය කොමිසමට එය ඉවත් කිරීමට බල කෙරුනි. දේශපාලන ලිපි හයක් සඳහා සයුරොටියුක් මහතාට වසර 15 ක සිර දඬුවමක් නියම කර ඇත.

සමාජවාදියෙකුගේ දේශපාලන ලේඛන සඳහා නඩු පැවරීම යනු, වඩාත් මූලික ප්‍රජාතන්ත්‍රවාදී අයිතිවාසිකම් – භාෂණයේ නිදහස, මාධ්‍ය නිදහස සහ දේශපාලන සංගමයේ නිදහස – උල්ලංඝනය කිරීමකි. මෙම යුද්ධය “ප්‍රජාතන්ත්‍රවාදය” සඳහා සටන් කරන බවට කරන ප්‍රකාශය වංචාවක් ලෙස එමඟින් හෙළිදරව් කෙරෙයි. වාමාංශික දේශපාලන පක්ෂ තහනම් කිරීම, මැතිවරණ අවලංගු කිරීම, ස්වාධීන මාධ්‍ය මර්දනය කිරීම සහ දැන් යුද විරෝධී සමාජවාදියෙකු වසර 15 කට සිරගත කිරීම – මේවා ප්‍රජාතන්ත්‍රවාදයක නොව ඒකාධිපතිත්වයක ක්‍රියාවන් ය.

මෙම නඩුව පිළිබඳව, ජාත්‍යන්තර වශයෙන්, රටවල් 40කට අධික සංඛ්‍යාවක දහස් ගණනක් ජනයා බලා සිටිති. යුරෝපීය මානව හිමිකම් අධිකරණය දැනටමත් සයුරොටියුක් මහතාගේ අයදුම්පත පිළිගෙන ඇත. මහාද්වීප පහක ඉතිහාසඥයන්, වෛද්‍යවරුන්, ගුරුවරුන් සහ සේවකයින් ඔහුගේ සිරගත කිරීමට විරෝධය පළ කරමින් ලියා ඇත. ලෝකය බලා සිටී.

2026 අගෝස්තු 10 වන දින තීන්දුව අවලංගු කර බොග්ඩන් සිරොටියුක් වහාම සහ කොන්දේසි විරහිතව නිදහස් කිරීමට නියෝග කරන ලෙස මම මයිකොලේව් අභියාචනාධිකරණයෙන් ඉල්ලා සිටිමි.

ඔබගේ විශ්වාසී,

පරාක්‍රම කුරුප්පු
සංස්කාරක – socialist.lk
කොළඹ, ශ්‍රී ලංකාව

නන්දන නන්නෙත්ති විසිනි

2026 ජුලි 1දා සිට පාර්ලිමේන්තු මන්ත්‍රීවරුන්ගේ ඉන්ධන දීමනාව වර්තමාන මිලට ගලපා වැටුප සමග ගෙවා ඇත. තමන්ට රුපියල් 60,000 මුදලක් වැටුපට එකතු වී ඇති බව, පසුගිය දා මන්ත්‍රී අර්චුනා පාර්ලිමේන්තුවේදී ප්‍රකාශ කලේ ය. ආන්ඩුව, “එපා ද, එපා නම් නො ගෙන ඉන්න“යි අර්චුනාට කෝචොක් කලේ ය. ඒ අනුව රුපියල් 60,000 දක්වා වන ගනන් ඉන්ධන වියදම් ලෙස, දුර ප්‍රමාන අනුව මන්ත්‍රීවරුන්ගේ පඩියට ලහි ලහියේ එකතු කර තිබේ.

පසු ගිය 10, 11 දෙදින තුල ග්‍රාම නිලධාරීහු ඉන්ධන දීමනාව වැඩි කරන ලෙස බලකරමින් ලෙඩ නිවාඩු දමූහ. 2018 සිට මේ දක්වා, ඔවුන්ට ගෙවූ රුපියල් 600/= ප්‍රවාහන වියදම් දීමනාව ශතයකින්වත් වැඩි වී නැත. එසේම, සියලු දීමනා සහිතව ග්‍රාම නිලධාරීයකුගේ වැටුප, පාර්ලිමේන්තු මන්ත්‍රීන්ගේ ඉන්ධන දීමනාවේ මෑත සිදු කල වැඩි කිරීමට පවා අඩු මුදලකි. එය, රුපියල් 55,000ත් 65,000ත් අතර ය.

2024 දී ග්‍රාම නිලධාරීන් සඳහා ඉන්ධන ලීටර් 20ක දීමනාවක් සඳහා කැබිනට් අනුමැතිය ලැබුන ද මේ දක්වා එය ක්‍රියාත්මක කර නැත. මෙවර ඔවුන් රජයෙන් කල ඉල්ලීමට ප්‍රතිචාර වශයෙන්, පසුගිය අය වැයෙන් ඊට ප්‍රතිපාදන වෙන් කර නැති බවත්, 2027 අය වැයෙන් එය ලබා දීමට රාජ්‍ය පරිපාලන අමාත්‍යාංශය කටයුතු කරන බවත් අමාත්‍යවරයා පවසා ඇත. එතෙක් සිය සොච්චම් පෞද්ගලික වැටුපෙන් ගමන් වියදම් දැරීමට නො හැකි බව ග්‍රාම නිලධාරීහු කියති.

නමුත් මන්ත්‍රීවරුන්ට 2026 සිට පැවති ඉන්ධන සීමාවට අදාල චක්‍ර ලේඛය ජුලි 1දා සිට බලපැවැත්වෙන පරිදි වහාම අවලංගු කර, නව ගැලපුම් කිරීමට ආන්ඩුවට හැකියාව තිබිනි. ඒ ජාතික ජන බලවේගය ආන්ඩුවේ සමානතාවය ක්‍රියාත්මක වන ආකාරයයි.

පොදුවේ කෘෂි උපදේශක, සමෘද්ධි වැනි සියලු බිම් මට්ටමේ නිලධාරීහු මෙම ප්‍රශ්නයට මුහුන දී සිටිති. කෘෂිකර්ම උපදේශක මුලු වැටුප රුපියල් 60,000 – 75,000 අතර ය. ක්ෂේත්‍ර හා ගමන් වියදම්වලදී ඉන්ධන දීමනාව ගනන් ගන්නේ ධාවන සටහන් පොත (Running Chart) අනුව ය. 2024 වසරේ සිට මේ නිලධාරීන්ට ගෙවන ඉන්ධන දීමනාව රුපියල් 7,500කි. මේ සඳහා, වරු 12ක් සහ කිලෝ මීටර් 400 ඉක්මවා ක්ෂේත්‍රයේ වැඩ කර තිබිය යුතු අතර සංචාරය කල දුර ප්‍රමානය කොතෙක් වුවත් එක වරුවක් හෝ අඩු වුවහොත් ඒ අනුව 1/12 වශයෙන් දීමනාව කපා දමයි.

2024 දී එතෙක් ගෙවූ රුපියල් 5,500 දීමනාව 7,500 දක්වා ගෙන ඒමත් සමග, එතෙක් පුහුනු කටයුතු සඳහා සහභාගී වීමේ දී නවාතැන් ආහාර හා ගමන් වියදම් ලබා දීමට අමතරව ගෙවූ රුපියල් 700- 800 වූ, වාර දෙකකට යටත්ව ගෙවූ සංයුක්ත දීමනාව කපා හැර ඇත. එනම් 2024 වැඩි කර ඇත්තේ යම්තම් රුපියල් 1,000 ඉක්ම වූ ප්‍රමානයක් පමනි. නව ගැලපුම් ගැන කතාවක් නැත.

මෙවන් බොහෝ රාජ්‍ය සේවකයන්ගේ ඉන්ධන දීමනා ලබා ගැනීමට මාස 6කට වඩා කාලයක් – සමහර විට අවුරුද්දක් පවා – බලා සිටිය යුතු ය. මෙහි අර්ථය නම්, ලැබෙන සොච්චම් වැටුපෙන් රාජකාරී අවශ්‍යතා උදෙසා වැය කර පෞද්ගලික අවශ්‍යතා අත් හැරීම, හෝ ඒ සඳහා නය ගොඩට තවත් නය එකතු කර ගැනීම ය.

2024 හා 2025 අය වැය ලේඛන මගින් වැඩි කෙරුනු වර්තමාන වැටුප් මට්ටම රජයේ සේවකයන්ගේ මිල දී ගැනීමේ (ක්‍රය) ශක්තිය දශමයකින් හෝ ඉහල දැමුවේ නැත. සත්‍යය නම්, ඒවා 2019 පැවතියාට වඩා අතිශයින් පහත හෙලා ඇති බව ය.

වැටුප් වැඩි කිරීම ඇස් බැන්දුමකි. 2019 දී සියලු දීමනා සහිතව, රුපියල් 45,000ක වැටුපක් හිමි වූ අයෙක් 2027 වන විට 75,000 පමන වැටුපක් ලබති. එනම් දල වශයෙන් 65% කින් පමන වැටුප් ඉහල ගොස් ඇත. එහෙත් මේ කාලය තුල භාන්ඩ මිල 150%ට වඩා වැඩි වී, එදා රුපියල් 35,000ක් වූ මාසික වෙලඳ පැස රු. 85,000 දක්වා පිම්මේ ඉහල ගොස් ඇත. ජාත්‍යන්තර මූල්‍ය අරමුදලේ යෝජනාවන්ට අනුකූලව ඉහල දැමූ වක්‍ර බදු ගෙවීමට සිදුවන නිසා සෑම මිල දී ගැනීමකදී ම අමතර වැය කිරීමකට නැති නම් කොල්ලකෑමකට පාරිභෝගිකයා ගොදුරු වේ. ආන්ඩුවේ සොච්චම් වැටුප්වලින් ජීවන වියදම පියවා ගැනීමට කිසි සේත් ම හැකියාවක් නැති බව රහසක් නොවේ.

අමතරව සේවක පුරප්පාඩු නො පියවා රජයේ සේවකයන් මත දැරිය නොහැකි රාජකාරී පීඩනයක් ද පවත්වා ගෙන යයි. විශේෂයෙන් සෞඛ්‍ය වැනි සේවාවල සහ තවත් බොහෝ ක්ෂේත්‍රවල මෙය කැපී පෙනේ. තත්වය කෙතරම් විනාශකාරී ප්‍රතිඵල ඇති කර තිබේ ද යත්, ගුරුවරුන්ගෙන් 30.4%ක් විශාදයෙන් පෙලෙන බවත් තවත් 13.4% ක් මධ්‍යම මට්ටමේ මානසික පීඩනයට ලක්ව සිටින බවත්, මෑතක රජරටව විශ්ව විද්‍යාලයේ ශල්‍ය වෛද්‍ය පීඨයේ පර්යේෂකයන් විසින් “ශ්‍රී ලංකාවේ රජයේ පාසැල් ගුරුවරුන්ගේ ආර්ථික බර සහ මානසික සෞඛ්‍ය පීඩනය“ (Examining the economic burden and mental health distress among government schoolteachers in Sri Lanka) නමැති වාර්තාවෙහි පැහැදිලිව සටහන් කරනු ලැබ ඇත.

ශ්‍රී ලංකාවේ සෞඛය සේවකයන්ගෙන් 42.5% ක් සීමාව ඉක්ම වූ කාන්සාවෙන් Anxiety පෙලෙති. ඉතාමත් කනගාටුදායක ලෙස සෞඛ්‍ය සේවකයන්ගෙන් 4.1% ක් අධි මානසික පීඩනය නිසා දිවි නසා ගැනීමේ සිතුවිලි පවා ඇති කරගෙන ඇත. වෛද්‍ය ක්ෂේත්‍රයේ නිරතයන්ගෙන් 71.4% ක් අනාගතය පිලිබද බලාපොරොත්තු විරහිතභාවයකින් පෙලෙති. ලෝක සෞඛ්‍ය සංවිධානය පෙන්වා දෙන පරිදි, ආර්ථික පීඩනය හා රෝහල්වල පුරප්පාඩු නිසා අධිකවැඩ බර හේතුවෙන් පවුල් සබඳතා බිඳ වැටීම විශාදයට බලපාන ප්‍රධාන හේතුවක් වන බව Research Gate වාර්තා කර ඇත.( විස්තර සඳහා ශ්‍රී ලංකාවේ සෞඛ්‍ය සේවකයන්ගේ මානසික සෞඛ්‍යය පිලිබඳ පර්යේෂන 2023- 2024 Ceylon medical journal සහ NIH- බලන්න)

දිනපතා ධනපති ව්‍යාපාරිකයන්ගේ ආදායම් ඉහල යමින්, දුප්පතුන් තවත් දුප්පත් වෙමින් රටේ “ඒක පුද්ගල ආදායම“ ඉහල යන අතර, මැති ඇමති හා ඉහල නිලධරයේ වරප්‍රසාද රැකේ.

මෙම අසමානතාව අඳුරේ තබමින් ආන්ඩුව සහ සංස්ථාපිත මාධ්‍ය, රජයේ සේවකයන් රාජකාරිය නිසි ලෙස ඉටු නො කරන දූෂිතයන් ලෙස හුවා දක්වන අවස්ථා බොහෝ ය. මෙය පවතින කොන්දේසිවලට එරෙහි පීඩාවට පත් ජනයා නොමග යැවීමේ දුෂ්ඨ උපායකි. එමගින් සියලු පීඩිත ජනයා එකිනෙකාට විරසකව පිහිටුවා ඔවුන්ගේ සටන් ශක්තිය බිඳ දැමීමට ඔවුහු වැඩ කරති.

වෘත්තීය සමිති ද මහජනයා දැනුවත් වී පන්ති අරගලයක් දක්වා මෙම අරගල වර්ධනය වීම සම්බන්ධයෙන් බියට පත්ව සිටී. ව්‍යාජ වාම සංවිධාන ද එවන් අරගලයක් වැලැක්වීම සඳහා හැකි හැම දෙය ම කරති. රාජ්‍ය සේවකයන් හා පොදුවේ කම්කරු පන්තිය එකිනෙකාගෙන් වෙන් කරමින් ලෙඩ නිවාඩු දැමීම වැනි හුදකලා, බෙලහීන ක්‍රියාවන්ට ඔවුන් යොමු කිරීමට මේ සමිති කටයුතු කරන්නේ එනිසා ය. එම වැඩ පිළිවෙලවල් මඟින් එකදු මූලික ප්‍රශ්නයක්වත් විසඳිය නො හැකි බව අප වටහා ගත යුතු ය. එම වැටහීම අයිතීන් දිනා ගැනීමේ ප්‍රථම කොන්දේසියකි.

කම්කරුවෝ තමන් වටා සෙසු පීඩිත ජනයා ඒකාබද්ධ කර ගත් අරගලයකින් සමාජ අසමානතාව අවසන් කිරීමේ වැඩ පිලිවෙල සඳහා සටන් වැදිය යුත්තාහ. එය මහා වැඩ වර්ජනයක ස්වරූපයෙන් ආරම්භ කිරීම වඩාත් උචිතය. ඒ සඳහා සමස්ත පීඩිත ජනයා දැනුවත් කර සංවිධානය කල යුතු ය. ඊට උචිත ප්‍රජාතන්ත්‍රවාදී සංවිධාන පාලක පන්තියේ හෝ ඊට සහාය වන පක්ෂ හා සංවිධානවලින් ස්වාධීන වීම අත්‍යවශය ඓතිහාසික අවශයතාවයයි.

නන්දන නන්නෙත්ති

පසුගිය ජුලි 5-6 දෙදින තුල මීගමුව බන්ධනාගාරයේ කැරලිකාරී සිද්ධීන් වලින් නිලධාරීන් හා රැඳවියන් 31කට දිවි අහිමි විය. 100කට අධික පිරිසක් තුවාල ලබා සිටිති. රැඳවියන් තවමත් ප්‍රහාරවලට ගොදුරු වන බව වාර්තා වෙයි. මාධ්‍ය මතු කරන්නේ මියගිය බන්ධනාගාර නිලධාරීන්ගේ පවුල් වල ඛේදවාචකය පමනෙකි.

සිද්ධියෙන් රැඳවියෝ 21 දෙනෙක් මිය ගියෝය. ඔවුන් අතර හිසට, පපුවට හා උදරයට තැබූ වෙඩි පහරවලින් මිය ගිය අය වෙති. දනහිසෙන් පහලට වෙඩි වැදීම් කිසිවක් වාර්තා වී නැත. මීගමුව බන්ධනාගාරයේ සිටි 2,400 කට අධික රැඳවියන් හා ඔවුන්ගේ ඥාතීන් අන්ත පීඩාවට පත් කරමින්, ඔවුන් කොන් කිරීමේ හා වෛරයට බඳුන් කිරීමේ දැනුවත් ව්‍යාපාරයක් රාජ්‍ය අනුග්‍රහයෙන් දියත් වී පවතී.

මීගමුව ප්‍රධාන මහේස්ත්‍රාත් අධිකරනයට අපරාධ පරීක්ෂන දෙපාර්තමේන්තුව ඉදිරිපත් කල පරීක්ෂන වාර්තාව තුල මෙම සිද්ධියට දී ඇති විශේෂ අර්ථකතනයට අනුව, “මේ වනාහී, බන්ධනාගාර පාලනය තමන් අතට ගැනීමට සහ මෙහෙයුම් කඩාකප්පල් කිරීමට රැඳවියන් ගත් උත්සාහයකි.”

ඒ අනුව 5දා, බන්ධනාගාරය තුල සංවිධානාත්මක මත්ද්‍රව්‍ය ජාවාරම්කරුවන් ක්‍රියාත්මක වීමට පටන් ගත් බව එම වාර්තාව කියයි.

එදා රාත්‍රී මීගමුව පොලිසිය ද, බන්ධනාගාර හදිසි වැටලීම් හා උපක්‍රමික බලකායේ (SPEAT) නිලධාරීන් 89 ක් ද සේවයට කැඳවා ඇත. අපරාධ පරීක්ෂන දෙපාර්තමේන්තුව වාර්තා කර නැති නමුත්, 6 වෙනිදා සිද්ධීන් දිග හැරෙන්නේ බන්ධනාගාර හදිසි වැටලීම් හා උපක්‍රමික බලකාය (SPEAT) විසින් රැඳවියන්ට එරෙහිව ඇති කරන ලද ප්‍රකෝපකරනය නිසා ය.

සිරකරු අයිතීන් සුරැකීමේ සංවිධානය වාර්තා කරන පරිදි, “ජුලි 5 සිද්ධියෙන් පසු බන්ධනාගාරය ලොක් ඩවුන් කලා. මූලික පහසුකම් අත් හිටුවා, බීමට ලබා දෙන ජලය සීමා කලා. වැසිකිලි භාවිතා කිරීමට ඉඩ දුන්නේ නැහැ.. පැය ගනනක් සිරකුටිවලම රඳවා තැබුවා. පවතින දැඩි උණුසුම, තදබදය, නිලධාරීන්ට පහර එල්ල වන්නේ මේ තතු නිසයි.”

සාමාන්‍ය තතු තුල පවා බන්ධනාගාරවල ජලය, නින්ද, බෙහෙත්, සෞඛ්‍ය ආරක්ෂාව වැනි මූලික අවශ්‍යතා දරුනු ලෙස සීමා වී ඇත. දැන් සිදු වී ඇත්තේ ඒවාට තව දුරටත් පහර දෙන විට සිදු විය හැකි දෙයයි.

CID වාර්තාවට අනුව, එදින උදෑසන 10.30-10.50 අතර විනාඩි 20 තුල රැඳවියන් පිරිසක් නිලධාරීන්ට මාරාන්තික ප්‍රහාරයක් එල්ල කර ඇත. එයින් නිලධාරින් 10ක් මරුමුවට පත් ව ඇත.
ඉනික්බිතිව කැඳවනු ලැබූ විශේෂ කාර්ය බලකාය ඉව බව නැතිව රැඳවියන්ට වෙඩි තබා ඇති අතර ඉන් රැදවියන් 19ක් මරනයට පත් වී ඇත.

එස්ටීඑෆ් භාවිතා කරන ටී 56 හා බන්ධනාගාර නිලධාරීන් භාවිතා කරන මිලි මීටර 9 පිස්තෝලවලින් නික්මුනු හිස් උන්ඩ 271 ක් හා සිද්ධියට සම්බන්ධ ගිනි අවි 60ක් පිලිබඳ පරීක්ෂන පැවැත්වෙන බව CIDය වාර්තා කර ඇත. නිලධාරීන් සතු ගිනිඅවි පවා පැහැරගෙන තිබූ බවට වාර්තා වූ බැවින්, මහජන ආරක්ෂාව වෙනුවෙන් බලය පාවිච්චි කිරීම හැර වෙනත් මඟක් නොවූ බව රජය නිවේදනය කලේය.

රැඳවියන්ගේ මානව හිමිකම් උල්ලංඝනය සහ ඔවුන්ට වද හිංසා පැමින වීම ගැන මානව හිමිකම් කොමිසමේ (HRCSL) නිලධාරීන්ට පැමිනිලි ලැබී ඇත‍. ඒවා ගැන සොයා බැලීමට අවශ්‍ය පරීක්ෂන සඳහා වැලිකඩ බන්ධනාගාරයට ඇතුලු වීමට ඔවුනට ඉඩ දී නැත. සිරකරු අයිතීන් සුරැකීමේ සංවිධානයේ නීතිඥ කන්ඩායමට ද සිරකරුවන් මුන ගැසී පුද්ගලිකව හා රහසිගතව සාකච්ඡා කිරීමට බන්ධනාගාර නිලධරය ඉඩ නොදුන් බව නීතිඥ සේනක පෙරේරා පසු ගිය 23දා පැවැති සාක්ෂි විභාගයේ දී, මීගමුව මහේස්ත්‍රාත්වරියට පැමිනිලි කලේ ය.

කිසිම ආකාරයකින් සිරකරුවන්ගේ හඬ පිටත සමාජයට ඇසෙන්නට ඉඩක් ලබා නො දේ. පැහැදිලිව ම සාධාරන පරීක්ෂනයක් සිදු වන්නේ නැත.

රජය බලා සිටියේ මෙම අවස්ථාව ඩැහැ ගැනීමට ය. පාලනය ගිලිහී ගියේ, ධාරිතාව 600 ක් වන මීගමුව බන්ධනාගාරයේ රැඳවියන් 2,400 ක රඳවා සිටී නිසා බව රජයේ නිගමනයයි. එය හුදෙක් ප්‍රශ්නය ගසා කා තමන්ට අවශ්‍ය වැඩ පිලිවෙල ක්‍රියාත්මක කිරීමේ ප්‍රවිෂ්ඨයකි.

“ඇප නොදී හැකි තාක් සිරගත කර තැබීම හා එවන් දඩුවම් මගින් අපරාධ සහ මත්ද්‍රව්‍ය පාලනය කල හැකිය” යන දන්ඩනීය මානසිකත්වය (Punitive mindset) පාලක පන්තිය විසින් සමාජගත කරනු ලැබේ.

උතුරු නැගෙනහිර යුද්ධය අවසානයේ එම ප්‍රතිපත්තිය, නඩු නැති ඝාතන හා සුදු වෑන්වලින් දියත් කරන ලදී. ඉන් අනතුරුව එක දිගටම ධනපති ආන්ඩුවලින් විවිධ නම් යටතේ – යහපාලන ආන්ඩුවේ මතින් තොර රටක්, ගෝඨාභය රාජපක්‍ෂගේ මතින් තොර රටක් හා මතින් තොර බන්ධනාගාර, රනිල් වික්‍රමසිංහගේ යුක්තියේ මෙහෙයුම, වර්තමාන ආන්ඩුවේ රටම එක මිටට ආදී වශයෙන් – ක්‍රියාවට නංවන ලද එකී ව්‍යාපෘතිය තබා ඇති වාර්තාව මෙසේ ය:

2000 වසරේ රඳවියන් 14,200
2015- 19,000, ඉන් මත්ද්‍රව්‍ය චෝදනා ලැබූවෝ 25%- 35% අතර වෙති.
2019- 25,000- මත්ද්‍රව්‍ය වැරදි – 40%
2021- 19, 400 මෙහිදී කොවිඩ් වසංගතය මධ්‍යයේ රැඳවියන් අඩු වී ඇත.
2023 – දැවැන්ත පිම්ම – ‘යුක්තියේ’ මෙහෙයුම – 33,000 – සමස්ත රැඳිවියන් සංඛ්‍යාවෙන් 50% ක් මත්ද්‍රව්‍ය වැරදි
2026 – 42,000 – ඉන් 70%-80% අතර පිරිසක් මත්ද්‍රව්‍ය වැරදි සඳහා.

ආන්ඩුවේම වාර්තා සඳහන් කරන්නේ බන්ධනාගාර ධාරිතාව මෙන්ම තෙගුණයකටත් සිව් ගුණයකටත් අතර ප්‍රමාණයකින් ඒවා පිරී ඇති බවයි! නිදා ගැනීමේ පහසුකම, මූලික සෞඛ්‍යාරක්ෂක පහසුකම් හා නිසි ආහාර වේලකට ඇති අයිතියට අහිමි කරන ලද ලක්ෂ භාගයක් ජනයා වසංගතවලට නිරාවරනය වී කූඩු වී සිටිති. බන්ධනාගාර තුළ ක්ෂය රෝගීන්ගේ අනුපාතය පිටත සමාජයේ එම අනුපාතය මෙන් සිය ගුණයකින් වැඩිය.

සම්පූර්න රැඳවියන් සංඛ්‍යාවෙන් නීත්‍යානුකූල නඩු විභාගයකින් වැරදිකරුවන් වූ අය සිටින්නේ 30% ක් (10, 509) පමනෙකි. ඉතිරි සියයට 70 ම – 24,256 – රිමාන්ඩ් භාරයේ සිටින්නන් ය. මේ අතර වැඩි දෙනා ඇප තැබීමට, නීතිඥයන්ට විය පැහැදම් කිරීමට හා තමන්ට නියම වුනු දඩය ගෙවීමට මුදල් නොතිබූ හෙයින් සිරගත වූවන් ය.

මේ කූඩු තුල ආතතීන් වැඩි වන විට ඒවා නොවැලක්විය හැකි ලෙස පුපුරා යයි. 2020 දී මහර දී ද, 2012 දී වැලිකඩ දී ද, 2011 දී අනුරාධපුරේ දී දී ද, 2000 දී කළුතර දී දී ද සිදු වූ එය අද මීගමුවේ දී සිදු වී ඇත. මේ සෑම අවස්ථාවකම ධනපති රාජ්‍යය ප්‍රතිචාර දක්වා ඇත්තේ බුලට්වලින් සහ සත්‍යය වසං කිරීමෙනි.

බන්ධනාගාර සැමන් ටින් මෙන් පුරවන ලද්දේ “පාතාලය සහ මත්ද්‍රව්‍ය උවදුර අවසන් කිරීමට“ ය. නමුත් වඩවඩාත් ප්‍රචන්ඩ ස්වභාවයෙන්; දේශපාලනඥයාගේ හා ආරක්ෂක නිලධාරීන්ගේ සිට සදාචාරවාදයේ හා විමුක්තියේ මාර්ගෝපදේශකයා ලෙස පෙනී සිටින ආගමික සංස්ථාව දක්වා ම, ඒ සියල්ල අලලා ගෙන මෙම තත්වය පැතිරී ඇත. ගුවන් නියමුවන් මත් වී ගුවන් යානා පදවා මිනිස් ජීවිත අනතුරේ හෙලීමේ සිද්ධි ගැන ද දැන් වාර්තා වේ. බන්ධනාගාරය තුලට මත් කුඩු, දුරකථන ගෙන යන්නේ නිලධාරීන්ගේ කලු කඩය බව නො දන්නා දෙයක් නො වේ.

මෙය ධනපති ලෝකය අලලාගෙන පැතිර ගිය වසංගතයකි. මෙරට පාලක පන්තියේ පෙර ගමන්කරු වන බ්‍රිතාන්‍ය අධිරාජ්‍යවාදී ආන්ඩුවේ වාර්තාව ශ්‍රී ලංකාවට දෙවැනි වන්නේ නැත.

අපගේ බන්ධනාගාරවල මත්ද්‍රව්‍ය අර්බුදයට මුහුණ දීම – 2024–26 සැසියේ හයවන වාර්තාව (එක්සත් රාජධානියේ පාර්ලිමේන්තුව)
“අපගේ බන්ධනාගාරවල නීති විරෝධී මත් ද්‍රව්‍ය වෙලඳාම සහ භාවිතය එහි ස්ථානීය ඉහලම මට්ටම් කරා ලඟා වී තිබේ. මත් ද්‍රව්‍ය භාවිතය ඉවසා සිටින, එය පිලිගන්නා, සංස්කෘතියක් පවතින අතර සිරකරුවන්ට ගැටලුවෙන් ගැලවීමට හෝ බන්ධනාගාරවලට එය සමග කටයුතු කිරීමට නො හැකි තරම් ය. මෙයින් පිලිබිඹු වන්නේ සිරකරුවන්ගෙන් 39% කට මත්ද්‍රව්‍ය පහසුවෙන් ලබා ගැනීමට හැකි බව ය. අපගේ වාර්තාවෙන් පෙනී යන්නේ, අපගේ බන්ධනාගාරවල ආවේනික මත්ද්‍රව්‍ය මට්ටම ජීවිත අනතුරේ හෙලන අතර, එම බන්ධනාගාරවල පාලනය සහ ආරක්ෂාව පවත්වා ගැනීමටත්, මත්ද්‍රව්‍ය වැරදි සම්බන්ධ සිරකරුවන් ඵලදායී ලෙස පුනරුත්ථාපනය කිරීමටත් රාජ්‍ය බන්ධනාගාර සහ පරිවාස සේවයේ (HMPPS) ඇති හැකියාව අඩපන කරන බවයි… පද්ධතිය අසාර්ථක වෙමින් පවතින අතර මිනිස් වියදම පිළිගත නොහැකිය.“

ලොව කොතැනක වුවත් ධනේශ්වර පද්ධතිය විවෘත පන්ති යුද්ධය වෙනුවට සම්මුතිවාදයට ඉඩ දුන් සාපේක්ෂ සමෘධියේ අවසානය කරා පැමින සෑහෙන කාලයක් ගෙවී ඇත.

උතුරු නැගෙනහිර යුද්ධය ඉක්මනින් අවසන් කර සමෘධිමත් රටක් ගොඩ නගන බව , එවකට ජවිපෙ සහාය ලත් රාජපක්ෂ ආන්ඩුව පොරොන්දු වූයේය. ඊට ජන මාධ්‍ය, වෘත්තීය සමිති හා සෙසු ව්‍යාජ වම්මුන්ගේ සහාය ගොනු විය. කම්කරු පන්තිය වාර්ගිකව බෙදීමටත්, සංවිධානාත්මක බලය බිඳ දැමීමටත් මෙම ප්‍රතිගාමී ව්‍යාපාරය වෙහෙස නො බලා වැඩ කලේ ය.

නාමිකව වේවා, යුද්ධය නිමා වී ඇත. එහෙත් එතෙක් කලක් සකලවිධ දෝෂයන්හි ගිනුම යුද්ධයට බැර කරමින් සිටි ධනපති ආන්ඩුවලින් කම්කරු පන්තියේ, පීඩිතයන්ගේ, තරුණයන්ගේ දැවෙන ප්‍රශ්නවලට විසඳුම් ලැබුනේ නැත. දැන් ශ්‍රී ලංකාව ඉහල මැදි ආදායම් ලබන රටකි. ධනපති වත්කම් ඉහල යද්දී දුප්පතුන් තවත් දුප්පත් වී ඇත.

ලංකාවේ ඉහලම ධනවතුන් සියයට 1 අත ජාතික වත්කම්වලින් 31% ක් ඒකරාශී වී පවතී. ජනගහනයේ අඩු වත්කම් සහිත දෙකෙන් පංගුව අත ඇති වත්කම් සමුච්චය සියයට 4 කට වඩා අඩුය. තරුනයන් ඉදිරියේ ඇත්තේ රැකියා නැති, ගෙයක් දොරක් නැති, බලාපොරොත්තුවක් නැති අනාගතයකි.

කුඩු රාජධානිය අඬු විහිදා පැතිරී ඇත. යුද්ධ පුහුනුව ලැබූ පොලිස් හා හමුදා සෙබලු සන්නද්ධ අපරාධකාරයන් බවට පත් ව සිටිති.

ආන්ඩුවේ පිලිවෙත, මේ තත්වයට සරිලන ප්‍රමානයෙන් බන්ධනාගාර වැඩි කිරීම ය.. ගාල්ල මහමෝදර පැරනි රෝහල වැඩි දියුනු කිරීම වෙනුවට එය බන්ධනාගාරයක් කිරීමට රජය තීරනය කර ඇත. එම බන්ධනාගාර තුළ ඇති විය හැකි කැරලි මර්දනය කිරීම සඳහා පොලිස් විශේෂ කාර්ය බලකායේ (STF) ආරක්ෂාව දිවයිනේ සියලුම ප්‍රධාන බන්ධනාගාර වෙත ලබාදීමට රජය පියවර ගෙන ඇත.

පාලක පන්තියට අනුව මේ වනාහී මහජන ආරක්ෂාව තර කිරීමයි.

කුප්‍රකට ඇමරිකනු ජනාධිපතිවරයෙකු වූ රොනල්ඩ් රේගන් එය මෙසේ සූත්‍රගත කලේය:

“රජය යනු මහජනතාවගේ මූලික අයිතිවාසිකම් සහ පෞද්ගලික දේපල ආරක්ෂා කරමින් සමාජයේ සාමය පවත්වාගෙන යන මධ්‍යස්ථ බේරුම්කරුවෙකි. එසේම, සිරගෙවල් යනු එම නීතිය සහ සාමය කඩකරන, අනුන්ගේ නිදහස උදුරාගන්නා පුද්ගලයන්ට දඬුවම් කර සමාජය ආරක්ෂා කරන සාධාරණ ආයතනයකි.”
“අපරාධවලින් අහිංසක වින්දිතයන් දුක් විඳින විට, අපරාධකරුවන්ට දඬුවම් කිරීම රටේ පැවැත්මට අත්‍යවශ්‍ය වේ.”

ශ්‍රී ලංකාව සම්බන්ධ ජාත්‍යන්තර කම්කරු සංවිධානයේ (ILO) නවතම වාර්තාවට අනුව, වසරකට සේවා ස්ථානවල අනතුරු හේතුවෙන් 60-80 අතර ප්‍රමානයක් මරනයට පත් වේ. 2000 ක පිරිසක් තුවාල ලබති. ඒ, ලාභ වැඩි කර ගැනීමේ අභිප්‍රාය වෙනුවෙන් ආරක්ෂක ක්‍රමෝපායයන් මඟ හැරීම නිසා ය. මේ මරණ සම්බන්ධයෙන් එක හාම්පුතෙක් හෝ එල්ලුම් ගසට නියම වූවාද?
ලෝක මට්ටමෙන් ගත් කල කුප්‍රකට බෝයිං මැක්ස් අර්බුදය ප්‍රබල සාක්ෂ්‍යයකි.

2018 ඔක්තෝබර් හා 2019 මාර්තුවල දී, Boeing 737 MAX ගුවන් යානා දෙකක් කඩා වැටී මිනිස් ජීවිත 346ක් අහිමි විය.

සමාගම් අතර තරඟය නිසා අනතුරු අවදානම සඟවා ගුවන් යානය භාවිතයට යෙද වූ බව පසුව හෙලි විය. මෙම සමූහ ඝාතනයට වග කිව යුතු අය එක දවසකට හෝ බන්ධනාගාරයක ගත කලෝ ද?

ප්‍රංශ නවකතාකරු ඇනටෝල් ෆ්‍රාන්ස් පවසන පරිදි, “නීතිය, එහි තේජාන්විත සමානාත්මතාවය තුළ ධනවතුන්ට මෙන්ම දුප්පතුන්ට ද පාලම් යට නිදා ගැනීම, වීදිවල යාචකයන් වීම සහ පාන් සොරකම් කිරීම තහනම් කරයි.”

නීතිය සියලු දෙනාට සමානව සලකන බව, පොත් පිටුවල පමනක් සඳහන් වන මායාවකි. යථාර්ථය වන්නේ, දුප්පතුන්ට පමනක් සිය ජීවිතය පවත්වාගෙන යාම සඳහා සිදු කිරීමට බල කෙරෙන ක්‍රියාකාරකම් මේ නීතිය විසින් ඉලක්ක කරනු ලබන බවයි.

ධනපති අතලොස්සකගේ අවශ්‍යතාවන්ට මහජනයාගේ අවශයතා යටත් කිරීම දුප්පත් කමේ හා සමාජ අසමානතාවයේ මූලය වන අතර නීතියේ කාර්යය වන්නේ එම අපරාධය ආරක්ෂා කිරීමයි.

අප මේ ප්‍රශ්නයට ඍජුව මුහුන දිය යුතු ය. මීගමුව බන්ධනාගාර සිද්ධිය හුදෙකලා සිදුවීමක් නොව, යලියලිත් සිදුවීමට නියමිත සමාන සිද්ධි දාමයක එක් පරිච්ඡේදයකි. ඊට පිලිතුර තවතවත් සිරගෙවල් සෑදීම නොවේ. දුප්පත්කම නිසා කිසිවෙකු සිරගත නොකරන, මත්ද්‍රව්‍ය වසංගතයේ මූලයන් වන සමාජ හේතූන් උපුටා දමන, පෞද්ගලික ලාභය වෙනුවට මානව අවශ්‍යතා සපුරා ලන සමාජයක් පමනක් ඊට විසඳුම් සපයනු ඇත. ඒ සඳහා, මේ අපරාධකාරී පද්ධතිය පෙරලා දැමිය යුතු ය.

මේ සිද්ධිය සම්බන්ධයෙන් යුක්තිය ඉටු වීම, ධනපති පන්ති පාලනයෙන් ඉටු වනු නැත. කම්කරු පන්තිය ප්‍රධාන මහජන අරගලයක් මගින් බොරු නඩු ඇටවීම, ටාගට් ක්‍රමයට මිනිසුන් අත් අඩංගුවට ගැනීම, නීතිඥයන්ට සිරකරුවන් මුන ගැසීමට බාධා පැමිනවීම වැනි වැනි මූලික ප්‍රජාතන්ත්‍රීය අයිතීන්ට එරෙහි ප්‍රහාර පරාජය කල යුතුු ය. මෝදර රෝහල් පරිශ්‍රය බන්ධනාගාරයක් බවට පරිවර්තනය කිරීමට ඉඩ නො දිය යුතුය. තරුනයන්ට සුරක්ෂිත ජීවිතයක් සහතික කල යුතුය.

මේ අරමුනු දිනන තෙක් සටන් කිරීමට සූදානම් සංවිධාන ගොඩ නැඟීමට ඉදිරියට එන මෙන් අපි කම්කරුවන්, තරුනයන්, ශිෂ්‍යයන්, ගොවීන්, ඇතුලු සියලු පීඩිතයන්ගෙන් ඉල්ලා සිටිමු. ධනපති පන්තියේ සියලු පක්ෂ හා සංස්ථාපිත වලට එරෙහිව කම්කරු ක්‍රියාකාරී කමිටු පිහිටුවා ගැනීම කල් නො දැමිය හැකි අවශ්‍යතාවකි.

අඩ සියවසක් පුරා සප්‍රතිපත්තික අරගලයක වාර්තාවක් දරන ආර්. අමරතුංග සහෝදරයා අද සිය 83 වන ජන්ම දිනය සමරයි. පන්ති විඥානයෙන් යුතු කම්කරුවෙකු සතු අප්‍රතිහත ධෛර්යය සහ විප්ලවවාදී ජීව ගුණය පිලිබඳ ජීවමාන උදාහරනයක් වන අමරතුංග සහෝදරයාගේ ජීවිතය තරුන විප්ලවවාදීන්ට මනා ආදර්ශයකැයි හැඟී යන හෙයින්, ඔහුගේ 80 වන උපන් දිනය වෙනුවෙන් නන්දන නන්නෙත්ති සහෝදරයා ලියූ සටහන යලි මෙහි උපුටා පළ කරමු. මුල් ලිපිය 2023 අප්‍රේල් 28 වන දින thesocialist.lk වෙබ් අඩවියේ පළ විය.

නන්දන නන්නෙත්ති විසිනි

ප්‍රතිපත්ති හා මූලධර්ම ආරක්ෂා කිරීමේ දී ඉන්ද්‍රඛීලයක් වන් කම්කරුවෙක්, මනස්කාන්ත මිනිසෙක්, අව්‍යාජ විප්ලවවාදියෙක්, ආදරවන්තයෙක්, ලෙන්ගතු මිත්‍රයෙක් යන සෑම භූමිකාවකම තමන් දන්නා කියන හැමගේ හද දිනූ අමරතුංග සහෝදරයා නව පරම්පරාවන්ට ජිවිතය කියා දීම සඳහා වටනා මොඩලයකැයි අපට සිතේ.

අමරතුංග සහෝදරයාගේ ජීවිතය හා ආත්මය, සමාජවාදය පිලිබඳ ඔහුගේ අවබෝධය සහ වගකීමේ ස්වභාවය ගැන වැටහීමකින් තොර ව පරිපූර්න ලෙස දැනගනු නො හැකි ය. 1990 අවුරුද්දේ සිට මේ දක්වාත් හෘද රෝගියකුව ප්‍රතිකාර ගන්නා ඔහු තම වෛද්‍යවරයාගේ ප්‍රශ්නයකට දුන් පිලිතුර ඊට එක් නිදසුනකි.

වි‌ශේෂඥ වෛද්‍ය මදුරාවේ වරක් ඔහුගෙන් මෙසේ අසයි. “ඔබ මෙහි පැමිනි කාලයේ ම ප්‍රතිකාර ගැනීමට පැමිනි අය අතරින් කී දෙනෙක් දැන් මේ පෝලිමේ සිටිනවා ද?”

“එක්කෙනෙක්වත් නැහැ” යනු අමරතුංගගේ පිලිතුරයි.

” ඒ ඇයි?” වෛද්‍යවරයා අසන්නේ ය.

“මම සමාජවාදියෙක්. මට ඉදිරි දර්ශනයක් තියෙනවා,”යැයි අමරතුංග පවසන්නේ සෙසු රෝගීන් මෙන් නොව තමන් අනාගතය වෙනුවෙන් දැනුවත්ව ජීවත් වන නිසා, අසීරු තත්වයන් ජය ගැනීමේ අන් රෝගීන්ට නැති හැකියාවක් තමන්ට ඇති බව ය.

සැතපුම් ගනන් දුර ඇවිදිමින් අප සමග හරි හරියට දේශපාලන වැඩවල යෙදුන අමරතුංග පසු බැස්සවීමට තරම් රෝගය සමත් නො වීය. වැඩිම වුනොත් “පොඩ්ඩක් ඉන්න සහෝදරයා” කියා පෙත්ත දිව යට තබාගෙන ටික වෙලාවක් මඳවේගී වීම හැර බාධාවක් ඔහුට නො වී ය.

මෙම ක්‍ෂමා විරහිත පන්ති සටන්කරුවා 1943 අප්‍රේල් 26දා හික්කඩුවේ දී උපත ලැබී ය. තොටගමුව විජයබා විද්‍යාලයේ 6 වන පන්තිය දක්වා පමනක් උගත් ඔහු 17 විය සම්පූර්න වීමටත් පෙර, එනම් 1959 දී බෝගලට ගොස් පතල් කම්කරුවෙකු ලෙස ජීවනෝපාය ද, ජීවිත අධ්‍යයනය ද ආරම්භ කලේ ය. පසුව තමන් සරන පාවා ගත් ඉතා ආදරනීය බිරිඳ දයා සහෝදරිය සමග පුතුන් 4 දෙනෙකු හදා වඩා ගත්තේ ය.

කතෝනිස් බාස් නම් පුද්ගලයෙකු විසින් අත්පත් කර ගන්නා ලද බෝගල මිනිරන් කැනීම 1887 න් පසු කැපී පෙනෙන ධනපති කර්මාන්තයක් ලෙස ඉහලට එසැවෙන්නේ කතෝනිස්ගේ උගත් දරුවන්ගේ මෙහෙයවීම යටතේ ය. මෙම කර්මාන්තය පීඩිත කම්කරුවන්ගේ ජීවිතය කෙතෙක් උරා බී වැඩුනේද යත්, මේ පතල මුහුදු මට්ටමට ද වඩා ගැඹුරට කනින ලදී. එහි සම්පූර්න ගැඹුර මීටර් 275කි. අමරතුංග ජීවිතයේ ගැඹුර ක්‍රමානුකූලව සොයා ගනිමින් සිටියේ ය.

1972 දී එවකට පැවති ලංකා සමසමාජ පක්ෂය (ලසසප), කොමියුනිස්ට් පක්ෂය (කොප) සහභාගී වූ සිරිමා බන්ඩාරනායකගේ සමගි පෙරමුනු ආන්ඩුව බෝගල පතල ද ධනපතියන්ට වන්දි ගෙවා ‘ජනසතු’ කලේ ය. ඉහත නම් සදහන් පක්ෂ දෙක ම මේ ‘ජනසතුව’ හැදින් වූයේ ධනපති විරෝධී හා සමාජවාදය කරා ප්‍රගතිශීලි ධනපතියන් ය යි ඔවුන් විසින් හැදින් වූ ධනපතියන් සමග එක්ව පියවර තැබීමක් ලෙස ය.

එවක අමරතුංග ඇතුලු බෝගල පතල් කම්කරුවෝ සමසමාජ පක්ෂයට අයත් වෘත්තීය සමිතියේ සාමාජිකයෝ වූහ. ජනසතුවෙන් දෙවසරක් ගිය තැන 1974 වසරේ පරිපාලනය හා වෘත්තීය සමිති නායකත්වය අමරතුංග සහෝදරයාගේ රැකියාව අහිමි කලහ. සමිති නායකයන් හාම්පුතුන් සමග එක්ව සාද පැවැත්වීම ඔහු විසින් ප්‍රශ්න කරනු ලැබීම ඊට තුඩු දුන් හේතුවයි. එවකට අපගේ සහෝදරයා මුරකරුවෙකු ලෙස රැකියාව කරමින් සිටි අතර කුමන්ත්‍රනකරුවෝ ඔහුගේ ආරක්ෂාව යටතේ තිබූ උපකරනයක් අතුරදහන් කර ඒ අනුව ඔහු රැකියාවෙන් නෙරපූහ. වෘත්තීය සමිති නායකයෝ, තමන් මෙම කුමන්ත්‍රනයේ හවුල්කරුවන් නො වන සේ පෙනී සිටි නමුත්, පැමිනිල්ලක් දැමීමට නියමිත කාලයට එක් දිනක් පසුවන තෙක් බලා සිට කම්කරු උසාවියට පැමිනිලි කිරීම මගින් නීතිමය රැකවරන සදහා උත්සාහ කිරීමට ඇති අවස්ථාවද ඔහුට අහිමි කලහ.

අමරතුංග සිය දරු පවුල සමග පෙරලා හික්කඩුවට පැමින කුලී වැඩ කරමින් ජීවිතයට මුහුන දුනි. 1976 රංගල්ල පාලම අසල කරදිය බාධක වේලි බැදීමට සහභාගී වූ කම්කරුවෙකු ලෙස සේවය කරමින් සිටි ඔහු විප්ලවවාදී කොමියුනිස්ට් සංගමයට මුන ගැසේ. සාකච්ඡා වට කිහිපයකින් පසු පක්ෂයේ සාමාජිකයෙකු ලෙස ආරම්භ කල ඔහුගේ අකලංක විප්ලවවාදී දේශපාලන ජීවිතය නො මැකෙන සටහන් තැබූ එකකි.

මෙම කම්කරුවා බඳවා ගැනීමේ සාකච්ඡා කීපයක් සිදු කිරීමට එවක පක්ෂයේ නව යොවුන් සාමාජිකයෙකුව සිටි මෙම ලිපියේ ලේඛකයාට ද අවස්ථාව ලැබුනේ ය යන්න ඉමහත් සන්තුෂ්ඨියකි. එතැන් සිට අමරතුංග, දැන් සමාජවාදී සමානතා පක්ෂයේ මධ්‍යම කාරක සභිකයෙක් වන රත්නසිරි මලලගම විසින් කුමන්ත්‍රනකාරී ලෙස පක්ෂයෙන් ඉවත් කිරීම සඳහා කටයුතු සැලසුම් කරනු ලබන තෙක් කිසිදු බාධාවකින් නො සෙල්වී පක්ෂයත් එහි ඉදිරි දර්ශනයත් ආරක්ෂා කරමින් සටන් වැදුනේ ය.

අමරතුංග පක්ෂයට බැඳීම, ජාත්‍යතර කම්කරු පන්තිය තලා දැමීම සදහා ක්‍රියාත්මක වූ දක්ෂිනංශික ව්‍යාපාරයට එරෙහිව සිදු වූවකි. 1971 බ්‍රෙටන්වුඩ් සම්මුතිය බිඳ දමමින් ප්‍රකාශයට පත් ලෝක ධනේශ්වර අර්බුදය පන්ති අරගලය උත්සන්න කලේ ය. වෘත්තිය සමිති හා කම්කරු පන්තියේ නමින් පෙනී සිටි පක්ෂවල පාවාදීම මත හිස එසවූ පාලක පන්තිය කම්කරු පන්තියට එරෙහි සම්මුති විරහිත ප්‍රහාරයක් දියත් කලේ ය. බ්‍රිතාන්‍යයේ මාග්‍රට් තැචර්ගේ සිට මෙරට ජේ. ආර් ජයවර්ධන දක්වා අන්ත දක්ෂිනාංශික ආන්ඩු, කම්කරු පන්තිය පූර්න ලෙස යටත් කිරීමට වැඩ ආරම්භ කලේ ය. අමරතුංග කම්කරු පන්ති ජාත්‍යන්තරවාදය පිලිගනිමින් ඒ වෙනුවෙන් ජීවිතයම කැප කිරීම තෝරා ගන්නේ මෙවන් පසුබිමක ය.

මෙම කම්කරුවා, සමසමාජකාරයන්ගේ කුමන්ත්‍රනයට ගොදුරු වූවා සේම සමසමාජයේ මහා පාවා දීමට එරෙහිව සටනක් කොට ගොඩ නැගූ සමාජවාදී සමානතා පක්ෂය (එකල විකොස) තුල වැඩී ඇති, මුලධර්ම විරෝධී, අවස්ථාවාදී උමතු කල්ලියේ ගොදුරක් වීම නාටකාකාර දේශපාලන ප්‍රකාශනයකි.

මීට වසර කිහිපයකට පෙර හික්කඩුව කලුපෙ ගම්මානයේ ලදරු පාසැලක පැවැත් වූ උත්සවයක පොල් තෙල් පහන දැල්වීමට අමරතුංගට ආරාධනා කරන ලදී. ගම්වැසියන් ඒ තරමටම මේ කම්කරුවාට ගරු කලේ ය, ආදරය කලේ ය, අවංක නායකයෙකු ලෙස පිලිගත්තේ ය.

එහෙත් අමරතුංග ඉතා ලෙන්ගතුව ආරාධනය ප්‍රතික්ෂේප කලේ ය. එම විවෘත කිරිමට පාලක පක්ෂයේ අතුකෝරාල නමැත්තා ද සහභාගී විම නිසා ය, අමරතුංග දෙවරක් නො සිතා එය ප්‍රතික්ෂේප කලේ. ධනපති නියෝජිතයන් සමග කම්කරු පන්තියට ගනුදෙනුවක් නැති බව ඔහු තම හිතවතුන්ට පෙන්වා දුන්නේ ය.

ප්‍රතිපත්ති සම්බන්ධ මේ දෘඩභාවය විප්ලවවාදියෙක් වුවත් කම්කරු පන්තිකයෙකු ලෙස තමන් හරියට ම ස්ථානගත කරගැනීමට අසමත් මධ්‍යම පන්තිකයෙකුට නැත. විකොස මධ්‍යම කාරක සභිකයෙකුව සිටින අතර ම මහාචාර්ය සුචරිත ගම්ලත්, එවක 60,000ක් ගම්බද තරුනයන් ඝාතනය කල යුඑන්පී ආන්ඩුවේ ඇමතියෙකු සමග 1990 දී වේදිකාරූඪ විම නිදසුනක් ලෙස පෙන්වා දිය හැකි ය.

අමරතුංග ආරාධනය ප්‍රතික්ෂේප කල දිනවලම මෙහි සඳහන් රත්නසිරි මලලගම, පක්ෂයේ මධ්‍යම කාරක සභිකයෙකු ලෙස සිටින අතර ම, සිය බිරිඳගේ ලදරු පාසැලේ විවිධ ප්‍රසංගයේ දී ආරධනා කර ගෙන්වා ගත් අතුකෝරල නමැති, අමරතුංග විසින් ප්‍රතික්ෂේප කරන ලද, පොදු පෙරමුනේ මන්ත්‍රී සමග එකට සිට පහන් දැල්වීම් යනාදිය සිදු කලේ ය. අමරතුංග ඇතුලු සාමාජිකයන් ඊට විරුද්ධ වූ විට රත්නසිරි සොයා බැලුවේ කැමරා ශිල්පියා ‍”එඩිට්” නො කර වීඩියෝව පිට කිරීම ගැන මිස සිය දේශපාලන නිවටකම කුමකින් පැන නැංගේ ද යන්න නො වේ.

විප්ලවවාදී පක්ෂය තුල මධ්‍යම පන්තික ප්‍රවනතා මතු වීම අරුමයක්වත් අසාමාන්‍ය දෙයක්වත් නො වේ. පක්ෂය ගොඩ නගන්නේ ප්‍රවනතා අතර දේශපාලන ගැටුම් තුලිනි. පක්ෂය පවතින මෙබදු ප්‍රවනතා හඳුනා ගැනීමේ දී අමරතුංග සහෝදරයාගේ දේශපාලන ජීවිතයෙන් ගත හැකි පාඩම් බොහෝ ය.

1988-89 විකොස සාමාජිකයින් තිදෙනෙක් ජවිපෙ ඝාතකයන් විසින් බිලි ගනු ලැබුනාහ. මේ අතර කිහිප වතාවක් ම ඝාතකයෝ මෙම ලියුමකරුගේ නිවස ද වට කල හ. පැරනි සාමාජිකයෙකු වූ සෝමරත්න කොඩිකාර සහෝදරයාට ද මරන තර්ජන එල්ල වී තිබිනි. පක්ෂය ජවිපෙ ක්‍රියාව හෙලිදරව් කරමින් කම්කරු පන්ති පිලිවෙත පැහැදිලි කල ලිපියක් මහජනයා අතර බෙදා හැරීම සඳහා අම්බලන්ගොඩ ශාඛාවට එවන ලදී. අම්බලන්ගොඩ ලෝකලයේ සාමාජික රත්නසිරි එදා අතුරුදන් වූ පසු නැවත දේශපාලනයට එන්නේ විජේවීර ඝාතනයෙන් පසුව ය. අමරතුංග මරනීය තර්ජනය මැද සිය පුතුන් පක්ෂයට බඳවා ගැනීමට හා, එසේ නො හැකි නම්, පක්ෂයේ ආධාරකරුවන් බවට පත් කර ගැනීමට තමන් කල කටයුතු ඉස්මත්තට ගත් අතර එක් පුතෙකු පක්ෂයට බඳවා ගත්තේ ය. අනතුරුව තාරක අමරතුංග නම් එම තරුනයා මරනයට කැප ව සිටි මෙම ලිපිකරුගේ ආරක්ෂාව ගැන ද දැනුවත් කර මා සමග දේශපාලන කටයුතුවල නිරත කලේ ය. ධනපති පන්තියට මෙන් ම කම්කරු පන්තියට ද බියපත්ව සැඟවී සිටිය නො හැකි ය.

මධ්‍යම පන්තියෙන් පක්ෂයට බැදෙන පුද්ගලයන් කම්කරු පන්තිය නැමති පාසලේ වසර ගනනාවක් පුහුනු කිරීමෙන් පසු මිස මොන ම වගකිව යුතු කටයුත්තක්වත් නො පවරන ලෙස ට්‍රොට්ස්කි පවසා ඇති දෙය ගැන තව බොහෝ ආදර්ශයන් අමරතුංගගේ ජීවිතයෙන් උකහාගත හැකි ය.

එවක අපගේ කම්කරුවාගේ කුඩා නිවස සෑම ඉරිදාවක ම පක්ෂයේ කටයුතු වෙනුවෙන් ම වෙන් විය. මේ කම්කරුවා ඒ හැම සාකච්ඡා වාරයක දී ම 15කට 20කට ආහාර පාන සැපයී ය. ඔහුගේ ආදරනීය බිරිඳ හා දරුවන් සැලකුවේ එය තමන්ට ලැබුනු අගනා අවස්ථාවක් ලෙස ය.

අපගේ කම්කරුවා පක්ෂයට බැඳෙන්නට පෙර තරමක් හිතුවක්කාරී හා දැඩි තීරන ගෙන තමන් නො රුස්නා දෙයට මුහුන දීමේ තත්වයක පසු වූ බව කියවේ. පක්ෂය තුල අමරතුංග අත්පත් කර ගත් දේ කෙතෙක් ද යත් මොහු සන්සුන් පුද්ගලයෙක් කර දීම ගැන තමන් පක්ෂයට නයගැති ය යි ඔහුගේ බිරිඳ දයා සහෝදරිය නිරන්තරයෙන් හා දැඩි තෘප්තිකරභාවයෙන් ප්‍රකාශ කරන්නී ය.

අමරතුංග සියලු අසීරුතා තිබිය දී සිය පුතුන් සිව් දෙනාට හැකි ඉහලම අධ්‍යාපනය ලබා දීමට අධිශ්ඨානවත් විය.

අමරතුංග තම එක් අතක පවතින දුර්වලතාව නො තකා වොලි බෝල් ක්‍රීඩාවට යොමු ව සිටියේ ය. නාට්‍යය, ගීතය, චිත්‍රය සහ මූර්තිය වෙත ඔහුගේ යොමු වීම දියුනු සංස්කෘතික කම්කරුවා පිලිබද ලකුනකි. 80 වියැති නමුත් තවමත් තරුන සිතැති මේ කම්කරුවා පොල් කටු යොදාගෙන කලාත්මක භාන්ඩ නිර්මානය කිරීමෙන් යම් ආදායමක් ද උපය යි.

මාක්ස්වාදී ව්‍යාපාරය හැම විට ම මෙබඳු පෙරටුගාමී කම්කරුවන් දිනා ගැනීම ඉලක්ක කර ගනී. ඔවුන්ට මිලියන සංඛ්‍යාත ජනයාට නායකත්වය දිය හැකි ය.

අවාසනාවට දැන් සිදුව ඇත්තේ වෙන දෙයකි. 2022 ජුලි 7 දින සිට සමාජවාදී සමානතා පක්ෂයෙන් ඔහු දොට්ට දමනු ලැබ ඇත. මෙම ලිපිකරුට එය හොදටම දැනේ. සංජය ජයසේකර සහ මා පක්ෂයෙන් දොට්ට දැමීමේ මුග්ධ තීරනය අමරතුංග මහත් සේ කම්පාවට පත් කලේ ය. දැන් මේ පක්ෂයේ සිට පලක් නැතැයි කියමින් වුවත් ඔහු උත්සාහ කලේ පක්ෂය තුල රැඳී සිටිමින් එය නිවැරදි කර ගැනීමට ය. අමරතුංග දොට්ට දැම්මේ හරියටම මේ උත්සාහය නිසා ය. මලලගමගේ මෙම කුමන්ත්‍රනය ප්‍රධාන ලේකම් දීපාල් ජයසේකර ඇතුලු දේශපාලන කමිටුව අනුමත කර ඇත.

එහෙත් අමරතුංග සහෝදරයා 4 ජාත්‍යන්තරයේ ජාත්‍යන්තර කමිටුවේ සහ සමාජවාදී සමානතා පක්ෂයේ ‌‌ඓතිහාසික හා දේශපාලන පදනම් මත පිහිටාගෙන සිය ජීවිත කාලයම සටන් වදින බව ගැන අපට සැක නැත. ඔහු එදා මෙන් ම අදත් සියල්ලට ම පෙර පක්ෂය යන අදහස අත් නො හැර වැලඳ ගෙන සිටී. සහෝදරයා, නුඹට දීර්ඝායු!